Beste hizkuntza

2018-02-12



Nekazaritza eta Landa Garapeneko zuzendari nagusiari


Landaola sarien banaketan, otsailaren 1ean, Nekazaritza eta Landa Garapeneko zuzendari nagusiak abeltzaintza ereduari buruz esandakoak argi uzten du bere buruhauste nagusienen artean etorkizunak ez duela lekurik aurkitu. Saiatu arren, ez dugu lortu “gizartea eboluzionatzea” eta “artzainak hazten jarraitzearen” arteko egokitasuna zertan oinarritzen duen asmatu. Testuinguruaren arabera susmatzen dugu zuzendari nagusiak Zaldibiko ekitaldi horretan esan nahi zuena Aralarko “artzainak hazten jarraitzeko” mendi hori urratzea eta pistaz betetzea nahitaezkoa gertatzen dela. Bere kasa aintzakotzat hartzen ez duenez, gogoratu arazi beharko diogu Aralarko ondarea zaintzeko legeak daudela eta horiek betetzea eta betearaztea direla Nekazaritzako eta Mendietako zuzendari nagusien eginbeharrak. Mendietako zuzendari nagusia balizko delitu batengatik akusatuta dago Tolosako Epaitegian, ustez Aralarko pista eraikitzeko legea urratzeagatik. Berarentzako, lege urraketa bat salatzeak ekologistak faltsu zital bihurtzen gaitu.

Ekologistok artzantzaren garapenaren alde gaude, baina, beti ere, garapen iraunkor baten alde, non ganadu karga larreen produktibitatearekin bat etorriko den eta beti ere, lurzoruen eta natur ondare orokorraren kontserbazioarekin uztartuko dena, horrek bakarrik bermatuko baitu artzaintzaren etorkizuna. Ez baitago etorkizun sozial edo ekonomikorik ingurumenaren iraunkortasuna zaintzen ez bada.

LANDARLAN  INGURUMEN  ELKARTEA


iruzkinik ez:

Argitaratu iruzkina

zer berri?